Бројот на жртвите од рускиот напад врз трговски центар во украинскиот град Криви Рих се искачи на 16, додека околу 130 луѓе се повредени. Спасувачките екипи продолжуваат да ги пребаруваат урнатините, бидејќи девет лица и понатаму се водат како исчезнати.
Нападот бил изведен со беспилотни летала во два последователни бранови. Според украинските власти, вториот удар се случил откако на местото веќе пристигнале спасувачки екипи и започнале со извлекување на луѓето од погодениот објект.
Криви Рих е родниот град на украинскиот претседател Володимир Зеленски. Тој нападот го оцени како намерен и суров, посочувајќи дека вториот удар можел дополнително да ги загрози луѓето кои пристигнале да им помогнат на повредените.
Меѓу повредените има и 23 деца, а здравствената состојба на дел од пациентите е тешка. Украинските власти стравуваат дека бројот на жртвите може да продолжи да расте додека трае пребарувањето на урнатините.
За помош во спасувачката операција во Криви Рих пристигнале екипи од уште четири украински региони. Локалните власти соопштија дека дел од исчезнатите лица сè уште не одговараат на телефонските повици.
Од Москва засега нема директен коментар за нападот врз трговскиот центар. Руското Министерство за одбрана, пак, соопшти дека целите на последните напади биле објекти поврзани со транспортната инфраструктура и складишта.
Украинските власти во меѓувреме известуваат за нови напади во повеќе делови од земјата. Во Запорожје едно лице го загубило животот, а уште четворица се повредени по напад со руски дрон. Во Миколаевската област, во одделни напади, загинале четири лица, меѓу кои и три деца.
Жртви се пријавени и во Харковската област, каде што според локалните власти загинале уште две лица. Во Киев, пак, неколку дена претходно во голем ракетен и дронски напад биле убиени 17 луѓе, а повеќе од 40 биле повредени.
Украинската страна во последниот период истовремено ги засили нападите врз цели на руска територија. Меѓу таргетираните објекти се наоѓаат рафинерии, енергетска инфраструктура, воени локации и складишта.
Киев тврди дека дел од овие објекти имаат директна улога во финансирањето или поддршката на руските воени операции.
Војната меѓу Русија и Украина трае од февруари 2022 година, а борбите и нападите продолжуваат и покрај дипломатските напори за прекин на конфликтот. Русија и понатаму контролира значителен дел од украинската територија, главно во источните и јужните области на земјата.
