Доналд Трамп Помладиот, синот на американскиот претседател Доналд Трамп, кон крајот на август отпатувал во Монголија, каде што два дена поминал на лов со рускиот бизнисмен Умар Кремљев, човек со блиски врски со кругови околу рускиот претседател Владимир Путин. Во исто време, американската амбасада во главниот град Улан Батор потрошила 18.715 долари за хотелско сместување на агентите на Тајната служба задолжени за неговата безбедност, објави „Фајненшл тајмс“.
Според истражувањето на весникот, Трамп Помладиот пристигнал во Улан Батор кон крајот на август, по што заминал во ловечки камп во западниот дел на земјата, оддалечен неколку стотици километри од главниот град. Таму престојувал два дена во друштво на Кремљев, како и на неколку водичи, возачи и готвачи.
Новинарите до овие информации дошле преку разговори со локални водичи и службени лица, податоци за летови, објави на социјалните мрежи и јавно достапни документи. Според американските финансиски записи, амбасадата платила 18.715 долари за хотелски соби во периодот од 23 август до 6 септември, додека агентите ја извршувале безбедносната задача. Трамп Помладиот, како член на потесното семејство на американскиот претседател, има постојана заштита од Тајната служба.
Кремљев, 43-годишен бизнисмен роден во Таџикистан под името Умар Лутфулојев, го сменил презимето во 2010 година. Според написот, претходно бил осудуван во Русија за изнуда и физички напад, а подоцна се поврзал со мотоциклистичката група „Ноќни волци“, позната по блискоста со Путин. Преку тие контакти, наводно, воспоставил врски со луѓе од руските политички и безбедносни кругови.
Во 2020 година Кремљев застана на чело на Меѓународната боксерска асоцијација (IBA), организација во која потоа влегле средства од рускиот државен енергетски гигант „Газпром“. Путин му го доделил и Орденот на пријателството. Минатата година Кремљев го презел и „Ролф“, голем руски синџир за продажба на автомобили, по одлука со која компанијата била изземена од државна сопственост.
Според информациите на „Фајненшл тајмс“, Кремљев на 27 август ја напуштил прес-конференцијата на IBA во Казахстан и со ноќен чартер-лет отпатувал за Улан Батор, од каде што продолжил кон ловечкиот камп. Со него патувал и рускиот бизнисмен Артур Мартиросов, партнер во инвестицискиот фонд „Восход“, кој е под американски санкции.
Еден од учесниците во патувањето изјавил дека Трамп Помладиот и Кремљев се обидувале да избегнат заедничко фотографирање во кампот. По двата дена лов, рускиот бизнисмен се вратил во Улан Батор, а потоа заминал за Јакутск на боксерски настан. Синот на американскиот претседател останал во Монголија уште една недела и продолжил со лов во покраината Бајан-Улгиј.
Еден од локалните водичи тврдел дека Трамп Помладиот застрелал алтајски аргали, дива овца што се смета за загрозен вид. Според податоците цитирани во извештајот, од 2019 година тој во Монголија уловил најмалку уште два аргалија. По завршувањето на престојот во ловиштата, се вратил во главниот град и се сретнал со монголскиот претседател Ухнаагијн Хурелсух. Негов претставник изјавил дека средбата била неформална и дека главно разговарале за активности на отворено.
Врските меѓу Кремљев и семејството Трамп, според написот, се развивале и преку боксот. По повторниот избор на Доналд Трамп за претседател, рускиот бизнисмен му испратил отворено писмо во кое го пофалил неговиот став против настапот на трансродови жени во женскиот бокс. Во септември минатата година, Трамп Помладиот и Кремљев се појавиле заедно на панел на настан на IBA во Истанбул.
Портпаролот на Трамп Помладиот тврди дека двајцата се запознале преку заеднички пријател и дека ги поврзуваат интересот за боксот и ловот, без деловни односи. Сепак, поранешниот висок функционер на ЦИА, Ден Хофман, предупредил дека контактите на Кремљев со семејството на американскиот претседател тешко би можеле да останат незабележани од руските служби. Според безбедносни експерти, спортските настани и приватните дружења понекогаш се користат за воспоставување влијание и контакти со луѓе блиски до политичкиот врв.
Дополнителни прашања отвори и свадбената прослава на Трамп Помладиот, одржана во мај на приватни острови на Карибите. Претходно истражувачкиот портал „ПроПублика“ објави дека Кремљев покрил дел од трошоците, вклучувајќи го изнајмувањето на еден од островите и огнометот. Претставник на Трамп Помладиот го опишал рускиот бизнисмен како негов личен пријател, нагласувајќи дека нивниот однос се темели на заедничките интереси за боксот и престојот во природа.
