Меѓународниот Аеродром Скопје повторно доби потврда дека квалитетот на услугите е препознаен и надвор од земјава. Аеродромот е прогласен за носител на престижното признание за најпријатно аеродромско искуство во Европа за 2025 година.
Наградата ASQ ја доделува Меѓународниот совет на аеродроми (ACI World), а годинава признанието беше официјално врачено во Истанбул, каде што на 2 септември се одржа глобалниот самит посветен на патничкото искуство.
За скопскиот аеродром ова е значаен јубилеј – 11-та награда од програмата Airport Service Quality. За разлика од признанијата што се темелат на проценка од организаторите, ASQ се потпира директно на впечатоците на патниците.
Токму нивните оценки се користат за проценка на повеќе сегменти од престојот на аеродромот, меѓу кои брзината на процедурите, безбедносните контроли, јасноста на информациите и ознаките, чистотата, удобноста и целокупната организација.
Од ТАВ Македонија нагласуваат дека признанието доаѓа во период на значително зголемен број патници, што претставува дополнителен предизвик за одржување на стандардот на услугите.
Генералниот директор на ТАВ Македонија, Неџат Курт, порача дека наградата е резултат на секојдневниот ангажман на вработените и довербата што ја покажуваат патниците.
„За нас ова е особено вредно признание затоа што оценката доаѓа од самите патници. Успехот покажува дека можеме да го следиме растот на сообраќајот, а истовремено да го задржиме квалитетот на услугите“, истакна Курт.
Скопскиот аеродром не беше единствениот од мрежата на ТАВ Аеродроми што оваа година беше награден. Признанија во различни категории добија и аеродромите во Анкара, Измир и Тбилиси.
ASQ програмата на ACI World се смета за едно од најрелевантните мерења на патничкото задоволство во авионскиот сообраќај, бидејќи резултатите се засноваат на непосредните искуства на луѓето кои ги користат аеродромските услуги.
