Американскиот претседател Доналд Трамп отворено призна дека Соединетите Американски Држави спроведуваат разузнавачки активности против Кина и Русија, додавајќи дека американските служби, според него, се поуспешни во шпионирањето од нивните противници.
Трамп ова го изјави во неделата, 1 ноември, за време на предизборен митинг на републиканците во Дубјук, во сојузната држава Ајова. Одговарајќи на наводните забелешки дека Кина ги шпионира САД, американскиот претседател рече дека таквите активности се очекувани и дека Вашингтон возвраќа со исти методи.
„Ми рекоа: Господине, Кина нè шпионира. Им одговорив дека и ние ја шпионираме Кина и дека нема причина за загриженост. Потоа ми кажаа дека и Кина и Русија нè шпионираат. Тоа е точно, но и ние ги шпионираме нив, само што го правиме тоа подобро“, порача Трамп.
Темата за разузнавачките операции ја отвори додека зборуваше за американските воени дејствија против Иран и тешкотиите со кои, како што рече, се соочува Вашингтон во обидите да пронајде соговорници од иранското раководство за продолжување на преговорите.
Трамп тврдеше дека иранските воени капацитети се сериозно уништени, наведувајќи дека земјата ги загубила својата морнарица, бродови и голем дел од воената авијација. Според неговите зборови, иранските авиони биле уништени на аеродромите, а земјата останала и без радари, противвоздушна одбрана и раководство.
Во еден момент американскиот претседател се пошегува дека нападите можеби биле премногу успешни кога станува збор за иранските лидери.
„Имаа лидери, но можеби малку претеравме со нив. Тоа сега ми создава проблем. Се обидувам да најдам некого со кого можам да разговарам, но никој не сака да биде претседател“, рече Трамп.
Митингот во Ајова беше организиран два дена пред американските избори за Конгресот. Трамп ја искористи средбата за да им даде поддршка на републиканските кандидати и да ги повика гласачите да излезат на изборите, со цел партијата да ја задржи контролата врз Конгресот.
Голем дел од неговото обраќање беше посветен на војната со Иран. Претседателот повторно тврдеше дека американската војска уништила значителен дел од иранската воена инфраструктура, но истовремено нагласи дека Вашингтон се обидува да воспостави контакт со преостанатите претставници на иранското раководство за да продолжат разговорите.
