Романските воени сили утрово активирале борбени авиони Ф-16 и испратиле воен хеликоптер кон пограничниот регион со Украина, откако во близина биле забележани три беспилотни летала. Информацијата ја соопшти романското Министерство за одбрана, наведувајќи дека дроновите биле забележани во близина на украинскиот град Вилкове, недалеку од романската граница и делтата на Дунав.
Поради можноста од паѓање предмети од воздух, надлежните служби испратиле предупредување до жителите во северниот дел на округот Тулча. Како превентивна мерка, два авиона Ф-16 на романското воено воздухопловство полетале за да ја следат состојбата, додека во пограничната област бил упатен и воен хеликоптер.
Од Министерството за одбрана соопштиле дека радарските податоци покажале оти беспилотните летала се движеле во украинскиот воздушен простор и дека ниту едно од нив не ја преминало границата со Романија. Откако било утврдено дека не постои непосредна опасност за романската територија, предупредувањето за населението било повлечено.
Романија, како членка на НАТО и Европската Унија, дели граница со Украина долж Дунав и во повеќе наврати подигнувала борбени авиони поради активности со дронови во близина на својата територија.
Во претходни случаи, на романска територија биле пронајдени остатоци од беспилотни летала по руски напади врз украински пристаништа и инфраструктура покрај Дунав. Поради ризикот од прелевање на воените активности надвор од Украина, романските власти го засилија надзорот над воздушниот простор и преземаат дополнителни мерки за обезбедување на границата.
