Украинскиот претседател Володимир Зеленски побара парламентот што побрзо да го разреши главниот државен обвинител Руслан Кравченко, откако неговата канцеларија се најде под лупата на антикорупциските истражители.
Кравченко минатата недела поднесе оставка, откако истрагата се прошири и на лица од неговата институција. Иако против него нема обвинение ниту е осомничен во конкретна истрага, едно од лицата под негова надлежност е обвинето дека помагало во функционирањето на група поврзана со измами.
Според украинските закони, оставката на главниот обвинител мора формално да биде доставена до парламентот преку претседателот. Пратеници најавија дека за неа би требало да се гласа во вторник.
„За главниот обвинител постои само еден пат – разрешување од функцијата. Тоа му го кажав“, порача Зеленски.
Кравченко во минатото се соочи со критики и поради наводно учество во обиди за ограничување на независноста на антикорупциските институции. Тој ги отфрла обвинувањата и тврди дека постапувал во рамките на своите овластувања.
Тој претходно потпишал известување за сомнение против директорот на Националното антикорупциско биро на Украина (НАБУ), Семен Кривонос, обвинувајќи го за сериозни незаконитости и наводно фалсификување службени документи.
Од НАБУ и Специјализираното антикорупциско обвинителство (САПО) ги отфрлија овие тврдења и порачаа дека изјавите на Кравченко претставуваат продолжување на, како што го нарекоа, „системскиот напад врз независните антикорупциски институции“.
Најновиот скандал дополнително го зголемува притисокот врз Зеленски. Антикорупциските случаи во Украина во последниот период предизвикуваат политички тензии и ја поткопуваат довербата на дел од јавноста во институциите и во претседателот.
