Германските возачи денеска се соочија со нов ценовен удар на бензинските пумпи. Во делови од земјата цените на горивата за само неколку минути скокнаа за десетици центи, а просечното поскапување на национално ниво достигна околу 20 центи за литар.
Во Кирхајм унтер Тек, цената на дизелот напладне нагло пораснала од 2,32 на 2,62 евра за литар. Во исто време, бензинот Super E10 поскапел од 2,22 на 2,46 евра.
Слични промени биле забележани и во Келн. Таму E10 достигнал 2,46 евра за литар, додека дизелот се продавал за 2,57 евра. Во периодот меѓу 11:45 и 12:15 часот, на ниво на Германија, E10 и дизелот во просек поскапеле за околу 20 центи, а Super E5 за 19 центи.
Наглото зголемување предизвика незадоволство кај возачите, особено кај оние кои секојдневно зависат од автомобилите за одење на работа. Дел од нив велат дека со вакви цени полнењето на резервоарот станува сериозен удар врз домашниот буџет.
Причината за растот се повисоките цени на суровата нафта, но и зголемените тензии на Блискиот Исток. Цената на европскиот референтен тип нафта „Брент“ во понеделникот надминала 107 долари за барел, додека проблемите со транспортот низ Ормускиот Теснец дополнително ја зголемуваат неизвесноста на пазарот.
Германските потрошувачи веќе плаќаат рекордно високи суми. Просечната цена на Super E10 во неделата достигнала 2,273 евра за литар, додека дизелот бил 2,404 евра.
Од здружението на германските оператори на бензински станици предупредуваат дека ситуацијата може дополнително да се влоши. Според нив, доколку цените на нафтата останат високи подолг период, не е исклучена можноста горивото во Германија да достигне 3 евра за литар.
Експерти предупредуваат дека особено дизелот би можел да се приближи до ова ниво доколку цената на нафтата подолг период остане над 110 долари за барел. Од операторите, воедно, бараат намалување на даночното оптоварување на горивата за да се ублажи ударот врз граѓаните и компаниите.
