Големи промени следуваат во Jaguar Land Rover, кој започна сериозно преструктурирање со цел да ги намали трошоците и да го стабилизира работењето во услови на пад на продажбата и растечки притисок од конкуренцијата.
Британскиот производител на луксузни автомобили во следните две години планира да ја намали работната сила за речиси 4.000 работни места, што претставува околу 10 проценти од вкупниот број вработени.
Компанијата веќе започна програма за доброволни отпремнини, а најголемиот дел од намалувањето се очекува да биде во Велика Британија. Производните работници, според досегашните информации, не би требало да бидат директно погодени.
Целта на JLR е во наредниот период да оствари заштеди од околу 1,7 милијарди фунти и значително да го намали бројот на возила што мора да ги продаде за да работи без загуба.
Компанијата е под дополнителен притисок поради царините, трговските бариери и сè посилната конкуренција од кинеските производители на автомобили.
Од британската влада порачаа дека нема да има државно спасување на JLR, иако се најавени разговори со раководството и синдикатите.
И покрај кратењата, производителот не се откажува од инвестициите. JLR планира да продолжи со петгодишната инвестициска програма вредна 18 милијарди фунти, со фокус на електричните возила и новите технологии.
Меѓу клучните новитети е и првиот целосно електричен Range Rover, додека Jaguar според актуелната стратегија треба да стане целосно електрична марка.
