Дваесет и осумгодишен жител на тетовското село Седларево почина откако се здобил со тешки повреди во несреќен случај при сеча на дрва во атарот на селото Горно Мелничани, во општина Дебар.
Според информациите од полицијата, несреќата се случила вчера во попладневните часови, по што веднаш била повикана Итната медицинска помош. Повредениот бил пренесен во болницата во Дебар, а поради сериозноста на повредите бил упатен кон Специјалната болница „Св. Еразмо“ во Охрид.
За жал, и покрај напорите на медицинските екипи, младиот човек починал за време на транспортот до здравствената установа.
На местото на настанот увид извршиле јавен обвинител, инспектор од Државниот инспекторат за труд и полициски службеници, кои ги утврдуваат причините и околностите под кои дошло до несреќата.
По налог на јавен обвинител ќе биде извршена обдукција, а истрагата треба да покаже како дошло до трагичниот настан.
