Сопругата на израелскиот премиер Бенјамин Нетанјаху, Сара Нетанјаху, предизвика остри реакции во Израел откако сугерирала дека опозицискиот лидер Јаир Голан можеби знаел за плановите на Хамас пред нападот на Израел на 7 октомври 2023 година.
Во интервју за израелскиот Канал 14, Сара Нетанјаху изјавила дека Голан бил „облечен и подготвен“ уште во раните утрински часови на 7 октомври, во момент кога, според неа, другите, вклучително и премиерот, не знаеле што се случува.
Изјавите предизвикаа жестока реакција од опозициската партија Демократи, која ги оцени како „подли и лажни“. Од партијата порачаа дека ширењето теории на заговор против Голан и доведувањето во прашање на неговото однесување за време на нападот претставуваат сериозно преминување на границата.
Јаир Голан, поранешен заменик-началник на Генералштабот на Израелските одбранбени сили, на 7 октомври 2023 година се упатил кон местото на масакрот на музичкиот фестивал „Нова“ и учествувал во спасувањето на луѓе.
Неговото дејствување во текот на нападот подоцна беше јавно пофалено. Засега нема потврдени докази дека Голан однапред знаел за планот на Хамас.
Изјавите доаѓаат во период на зголемени политички тензии во Израел, неколку недели пред парламентарните избори, кои според анкетите би можеле да бидат неизвесни. Според едно августовско истражување, значителен дел од граѓаните веруваат дека внатрешно предавство придонело за масакрот на 7 октомври.
