Финалето на ватерполо турнирот на Медитеранските игри во Таранто, во кое Италија ја совлада Црна Гора со 18:14, беше проследено со сериозни обвинувања за несportsко однесување.
Наместо во центарот на вниманието да биде само освојувањето на златниот медал, по натпреварот двете репрезентации се обвинуваа меѓусебно за инциденти во базенот, меѓу кои и наводни гризења за време на дуелите.
Еден од спорните моменти се случи во последната четвртина, при резултат 15:12 за Италија. Црногорскиот ватерполист Данило Ступар беше исклучен поради груб дуел со Матео Јоки Грато, и тоа во ситуација кога топката не била во близина.
При излегувањето од базенот, Ступар им покажал на судиите и на камерите трага на раката. Од црногорскиот табор тврдат дека повредата била предизвикана од гризење.
Ситуацијата предизвикала бурна реакција од клупата на Црна Гора, по што селекторот Дејан Савиќ добил црвен картон и бил испратен надвор од базенот.
Но, приказната не завршила со тоа. По натпреварот се огласил и Италијанскиот пливачки сојуз, кој објавил фотографија на која се гледа голема црвена трага на рамото и грбот на еден од италијанските ватерполисти.
Италијанската страна не навела директно дека станува збор за гризење, ниту посочила конкретен црногорски играч како виновник. Сепак, објавата јасно покажа дека и италијанската репрезентација смета дека нејзин играч бил повреден во текот на финалето.
Спортскиот епилог сепак е јасен – Италија стигна до златото со победа од 18:14 и го освои својот седми трофеј на Медитеранските игри.
Италијанците турнирот во Таранто го завршија без пораз, а титулата е нивна прва на Медитеранските игри по пауза од повеќе од три децении.
