Понекогаш и најобичните предмети за домаќинството можат да станат хит на социјалните мрежи. Токму тоа се случи со кантите за смет од ИКЕА, кои привлекоа големо внимание поради практичниот дизајн, ниската цена и можноста да се користат на различни начини.
Станува збор за моделот TRÖSKNING, кој е осмислен така што кантите можат да се поставуваат една врз друга, без да се изгуби лесниот пристап до нивната содржина. Со едноставниот изглед и неутралната боја, тие лесно се вклопуваат во различни простории, особено во кујните и помалите домови.
Првичната намена им е селектирање сув отпад, како пластика, лименки и стакло. Благодарение на отворите на предната страна на капаците, предметите можат да се фрлаат без да мора да се поместува горната канта. Ова ги прави особено практични за домаќинства со ограничен простор.
Сепак, купувачите пронашле и други начини да ги искористат. Освен за отпад, кантите можат да послужат за складирање градинарски прибор, кеси за пазарување и различни ситници што често создаваат неред во домот.
Посебно внимание привлече видео на социјалните мрежи во кое две вакви канти се поставени една врз друга, но наместо отпад, во нив се чуваат кромид и компири. Објавата достигнала дури 1,5 милиони прегледи, покажувајќи како еден едноставен производ може да добие сосема поинаква улога.
Идејата не е изолирана. Дел од купувачите на страницата на ИКЕА споделиле дека ги набавиле кантите токму за складирање зеленчук. Сепак, компанијата наведува дека производот не е наменет и не е одобрен за чување храна, па за таа цел се препорачуваат соодветни садови.
Популарноста на моделот ја потврдуваат и оценките на хрватската интернет-страница на ИКЕА, каде што производот има просечна оцена од 4,8 од максимални пет ѕвездички. Корисниците ги издвојуваат практичноста, димензиите и едноставниот дизајн.
Помалата верзија, со капацитет од 12 литри, се продава за 4,99 евра, додека поголемата, од 25 литри, чини 8,99 евра.
Комбинацијата од пристапна цена, функционалност и можност за повеќенаменска употреба очигледно е причината поради која овие на прв поглед обични канти станаа тема на разговор на социјалните мрежи.
