Жозе Мурињо продолжува да потврдува дека е еден од најуспешните тренери во историјата на шпанскиот фудбал. По убедливата победа на Реал Мадрид над Валенсија од 3:0 на стадионот „Местаља“, португалскиот стратег стигна до импресивна статистика која го постави на врвот на една значајна историска листа во Ла Лига.
Мурињо во досегашните 126 натпревари во шпанското првенство забележал 97 победи, што претставува успешност од 77 проценти. Со овој учинок е најуспешен меѓу тренерите кои воделе најмалку 100 натпревари во историјата на натпреварувањето.
Веднаш зад него се наоѓа Пеп Гвардиола со 76,3 проценти успешност, односно 116 победи на 152 натпревари. Третото место му припаѓа на Карло Анчелоти, кој има 162 победи на 228 средби, со успешност од 71,1 процент.
Интересно е што уште подобар процент има актуелниот тренер на Барселона, Ханси Флик. Германецот досега остварил 69 победи на 87 натпревари, што претставува успешност од 79,3 проценти. Сепак, тој сè уште нема достигнато 100 натпревари, па не ги исполнува условите за главната статистичка категорија.
Најуспешни тренери според процентот на победи во Ла Лига:
- Ханси Флик – 79,3% (69 победи на 87 натпревари)
- Жозе Мурињо – 77% (97 победи на 126 натпревари)
- Пеп Гвардиола – 76,3% (116 победи на 152 натпревари)
- Карло Анчелоти – 71,1% (162 победи на 228 натпревари)
Во триумфот над Валенсија, Реал Мадрид поведе со голот на Федерико Валверде во 28. минута, а Арда Ѓулер ја зголеми предноста осум минути подоцна. Конечните 3:0 ги постави Килијан Мбапе во 75. минута.
За мадридскиот клуб ова беше осма последователна победа во сите натпреварувања, со која продолжи успешната серија и ја потврди добрата форма на тимот.
