Проблемите со бубрезите не влијаат само врз исфрлањето на штетните материи од телото, туку можат да имаат последици и врз здравјето на коските. Овие органи секојдневно ја филтрираат крвта, ја регулираат количината на течности и минерали и учествуваат во повеќе важни процеси, но нивните заболувања често напредуваат без јасни симптоми.
Нефрологот д-р Џорџ Харт за магазинот „Параде“ објаснува дека бубрезите имаат значајна улога во одржувањето на рамнотежата на течностите, отстранувањето одредени токсини, зачувувањето на коскеното здравје и регулирањето на бројот на црвените крвни клетки.
Една од нивните важни задачи е контролата на минералите во организмот, особено калциумот и фосфорот, кои се неопходни за цврстината на коските. Бубрезите учествуваат и во претворањето на витаминот Д во неговата активна форма, која му овозможува на телото подобро да го апсорбира калциумот од храната.
Кога функцијата на бубрезите е нарушена, може да дојде до дисбаланс на минералите, слабеење на коскеното ткиво и зголемен ризик од скршеници. Поради тоа, зачувувањето на здравјето на бубрезите е важно и за одржување на силни коски.
За намалување на ризикот од заболувања, д-р Харт препорачува урамнотежена исхрана и редовна физичка активност. Тој советува да се ограничи консумирањето преработена храна, прекумерни количества сол и засладени пијалаци.
Овие промени во секојдневните навики можат да помогнат во намалувањето на ризикот од висок крвен притисок и дијабетес тип 2, кои се меѓу главните причини за појава на бубрежни заболувања. Се препорачуваат најмалку 150 минути умерена физичка активност неделно, а пред редовно земање лекови треба да се побара совет од лекар.
Посебно значајни се и редовните медицински контроли, бидејќи проблемите со бубрезите во почетните фази често не предизвикуваат забележливи тегоби. Анализите на крвта и урината можат да помогнат во раното откривање на нарушувањата и следењето на состојбата.
Промени во мокрењето, отоци, постојан замор и ненадејно појавување висок крвен притисок можат да бидат предупредувачки знаци. Сепак, овие симптоми не мора секогаш да значат дека станува збор за бубрежно заболување, па затоа е важно причината да ја утврди лекар.
