Тензиите во Манчестер јунајтед по несогласувањата меѓу тренерот Мајкл Карик и капитенот Бруно Фернандеш се обидуваат да бидат надминати со разговор зад затворени врати. Двајцата се сретнале во тренинг-центарот Карингтон во вторникот, во обид да ги расчистат разликите пред саботното гостување кај Челси, објави Би-Би-Си.
Несогласувањата следуваа откако Фернандеш јавно ја критикуваше тактиката на Карик по поразот од Комо со 4:1 во Лигата на шампионите. Португалскиот играч за врска сметал дека тимот се повлекол премногу длабоко и му дозволил на противникот да ја преземе контролата, наместо со поагресивен пресинг да се обиде да го промени текот на натпреварот.
Карик по изјавите на капитенот не ја исклучи можноста за дисциплински мерки. На следниот натпревар, против Борнмут, Фернандеш го остави на клупата за резерви. Тренерот пред средбата тврдеше дека станува збор за чисто фудбалска одлука, но Португалецот не доби ниту една минута на теренот. Манчестер јунајтед пред своите навивачи загуби со 3:0.
Според Би-Би-Си, разговорот меѓу Карик и Фернандеш се одржал одделно од состанокот што стручниот штаб го имал со останатите фудбалери. Засега не е познато кој ја иницирал средбата, ниту дали капитенот се извинил за своите јавни коментари. Сепак, се очекува тој повторно да биде во конкуренција за почетниот состав за дуелот со Челси.
Во меѓувреме, се поставуваа прашања и за иднината на Карик по лошите резултати на тимот. Според објавените информации, клубот решил да му даде доверба на 45-годишниот тренер, кој минатата сезона ја презеде екипата по заминувањето на Рубен Аморим и ја одведе до третото место во првенството.
Реакциите на навивачите по поразот од Борнмут ја покажаа разликата во нивниот однос кон тренерот и играчите. Карик беше испратен со аплаузи и скандирање на неговото име, додека фудбалерите кои го напуштаа теренот добија гласни свирежи.
Ова не е прв случај на јавно незадоволство во клубот во последниот период. Аргентинскиот дефанзивец Лисандро Мартинез претходно ја критикуваше клупската управа, особено спортскиот директор Џејсон Вилкокс, поради, според него, недоволните вложувања во играчкиот состав за време на летниот преоден рок.
