Молдавија утрово се соочи со сериозен безбедносен инцидент откако повеќе беспилотни летала биле регистрирани во нејзиниот воздушен простор. На неколку места одекнале експлозии, а безбедносните служби пронашле остатоци од летала. Засега нема информации за повредени лица.
Министерството за одбрана на Молдавија соопшти дека системот за воздушен надзор регистрирал повеќе дронови над територијата на земјата, меѓу другото во близина на Анениј Ној, Штефан Вода, Тудора и Кушени.
По пријавите од граѓаните, полицијата започнала проверки на повеќе локации. Жителите на неколку области пријавиле силни детонации надвор од населените места, а на терен биле пронајдени делови за кои се претпоставува дека потекнуваат од беспилотни летала.
Остатоци биле пронајдени во близина на Кушени, Дубовца и Хинчешти, како и на просторот меѓу Делакау и Пухачени. Во еден од случаите, полицијата по пријава за експлозија и густ чад открила остатоци од летало.
Посериозен инцидент бил регистриран кај Крокмаз, во областа Штефан Вода. По падот на леталото во близина на лозови насади избил пожар на вегетацијата, додека од ударот биле оштетени и прозорците на земјоделски објект.
Молдавските власти веднаш започнале истрага за сите пријавени случаи. Граѓаните се предупредени да не се приближуваат до пронајдените делови од летала и веднаш да ги известат надлежните служби доколку забележат сомнителни предмети.
Инцидентите се случиле во време кога Русија изведувала нови воздушни напади врз Украина со беспилотни летала и ракети. Молдавија засега не објавила конечни информации за потеклото на сите пронајдени летала, ниту потврдила дека нејзината територија била намерна цел.
Претседателката Маја Санду го осуди рускиот напад врз Украина и предупреди дека последиците од војната сè повеќе се чувствуваат и надвор од украинската територија. Таа објави дека пет руски средства за воздушен напад, меѓу кои ракети и дронови, го нарушиле молдавскиот воздушен простор и експлодирале на територијата на земјата.
Истрагата за инцидентите продолжува, а молдавските институции треба да утврдат од каде потекнувале леталата и под кои околности навлегле во воздушниот простор на земјата.
