Случајот со заминувањето на Ива Михаилова во Бугарија прераснува во нова точка на судир меѓу Скопје и Софија. Премиерот Христијан Мицкоски со остри зборови го обвини бугарското политичко раководство дека се обидува да демонстрира моќ преку овој случај, а истовремено порача дека и Михаилова и нејзиниот татко, според него, ќе мора да се соочат со македонските институции.
Мицкоски за првпат јавно се произнесе за случајот за време на посетата на Битола, каде што беше претставена новата инвестиција на германската компанија „Кромберг и Шуберт“. Одговарајќи на новинарски прашања, премиерот ги поддржа тврдењата на министерот за внатрешни работи дека Михаилова ја напуштила земјата на нерегуларен начин, отфрлајќи ги информациите објавени во бугарските медиуми дека таа и нејзиниот адвокат ја преминале границата преку официјален премин.
„Апсолутно е невистина тоа што го емитуваа бугарските медиуми“, рече Мицкоски, оценувајќи дека тврдењата за регуларно преминување на границата и наводниот свечен пречек не одговараат на информациите со кои располагаат македонските власти.
Според премиерот, во евиденцијата последниот влез на адвокатот на Михаилова во Македонија бил регистриран на 28 септември. Тој посочи дека за ова имало потврда и од бугарска страна, но не презентираше дополнителни детали за околностите под кои Михаилова заминала од државата.
Најостриот дел од неговото обраќање беше насочен кон официјална Софија. Мицкоски оцени дека бугарското политичко раководство се обидува да ја искористи ситуацијата за политичко надмудрување, предупредувајќи дека таквиот пристап може да има последици и за самата Бугарија.
„Жалам што политичкото водство во Бугарија се обидува на овој начин да покаже политички мускули“, изјави премиерот.
Тој изрази незадоволство и од начинот на кој Михаилова се претставува во Бугарија, посочувајќи дека таа најголемиот дел од животот и образованието ги поминала во Македонија.
Мицкоски побара од бугарските власти да ги вратат Михаилова и нејзиниот татко, отфрлајќи ги шпекулациите дека зад нивното заминување можеби стоел договор. Премиерот порача дека, доколку таков договор навистина постои, двете лица треба да се вратат во земјава.
„Ако е тоа така договорено, ние ги бараме назад и неа и нејзиниот родител. Уште денеска нека ги донесат и да видиме дали е така договорено или не“, рече Мицкоски.
Тој не застана тука, туку испрати и директна порака дека случајот, според него, нема да биде заборавен и дека очекува одговорност.
„Ве гледам во очи и ви кажувам: кога-тогаш. И татко ѝ и таа ќе одговараат. Кога-тогаш“, порача премиерот.
Сепак, кога беше прашан дали враќањето на Михаилова може да се обезбеди преку екстрадиција, имајќи ги предвид правните ограничувања поврзани со екстрадицијата на бугарски државјани, Мицкоски не понуди конкретно правно образложение. Наместо тоа, го повтори барањето таа да биде вратена во Македонија.
Случајот отвори и нов фронт на домашната политичка сцена. Премиерот ја нападна опозицијата, која бара оставка од министерот за внатрешни работи Панче Тошковски, обвинувајќи ја дека зазема позиции слични на оние на бугарското политичко раководство.
Според Мицкоски, опозицијата се обидува да го претвори случајот во политичка пресметка со цел да му наштети на рејтингот на владејачката коалиција предводена од ВМРО-ДПМНЕ.
И додека политичките обвинувања се заоструваат, клучните прашања остануваат отворени: како точно Михаилова ја напуштила Македонија, какви докази имаат надлежните институции и дали ќе следуваат конкретни правни постапки. Дотогаш, случајот продолжува да ги продлабочува тензиите меѓу Скопје и Софија, а најавите за одговорност ќе треба да бидат проследени со факти и постапки во рамките на законот.
