Американскиот претседател Доналд Трамп денеска пристигнува во Ирска, каде што властите подготвија една од најголемите безбедносни операции во историјата на ирската полиција.
Трамп ќе престојува во Даблин, каде што се предвидени средби со највисоките ирски функционери, а ќе го посети и својот голф-ресорт во Дунбег, во округот Клер, каде што во тек е „Irish Open“.
Американскиот претседател се очекува да се сретне со ирската претседателка Кетрин Коноли во нејзината официјална резиденција, а потоа и со премиерот Мајкл Мартин. Предвидени се и други активности во резиденцијата на американскиот амбасадор во Ирска.
Посетата ја следат најави за протести против политиките на Трамп. Ирската полиција соопшти дека ќе овозможи мирни демонстрации, но предупреди дека нема да дозволи нарушување на јавниот ред или блокирање на движењето на американскиот претседател.
Полицијата најави засилено присуство и подготовка на водени топови доколку ситуацијата ескалира. Надлежните порачаа дека ќе бидат преземени правни мерки против секој што ќе изврши кривично дело.
Ирските власти, сепак, посетата ја гледаат и како можност за дополнително зајакнување на традиционално блиските односи со САД. Заменик-премиерот Сајмон Харис нагласи дека двете земји имаат силни политички, економски, историски и културни врски.
САД се најголем трговски и инвестициски партнер на Ирска. Според ирската влада, повеќе од 900 американски компании директно вработуваат околу 245.000 луѓе во Ирска, додека стотици ирски компании во САД обезбедуваат работа за повеќе од 200.000 лица.
