За милиони љубители на рок-музиката, Linkin Park беше еден од бендовите со кои започна нивната љубов кон рокот и металот. Сега приказната за еден од највлијателните модерни рок состави добива и филмско издание.
Филмот „Linkin Park: Unshatter“ во кината пристигнува на 30 септември и го следи патот на групата низ еден од најтешките, но и најзначајните периоди во нејзината кариера.
Остварувањето комбинира документарни снимки со концертни моменти, а режијата е на Џо Хан, еден од основачите на бендот. Камерите го следат процесот од студиските сесии започнати во 2022 година, па сè до создавањето и објавувањето на албумот „From Zero“ во ноември 2024 година.
Во филмот членовите зборуваат за повторното обединување, обновувањето на старите пријателства и создавањето нова музика по тешкиот период кој следеше по смртта на пејачот Честер Бенингтон.
Посебен дел е посветен на концертот во Сао Паоло одржан на 15 ноември 2024 година, истиот ден кога беше објавен „From Zero“.
НОВА ПОСТАВА, НО ПРЕПОЗНАТЛИВИОТ LINKIN PARK
Повратокот донесе и промени во составот. Тапанарот Роб Бурдон не се врати во групата, додека гитаристот Бред Делсон повеќе не настапува редовно на концерти.
На нивно место во новата ера се приклучија пејачката Емили Армстронг и тапанарот Колин Бритен. Нивното вклучување не било резултат на класични аудиции, туку се развило постепено преку заедничка работа и музички сесии со останатите членови.
За концертните настапи подоцна се приклучил и гитаристот Алекс Федер.
Членовите откриваат дека во одреден момент размислувале и за ново име на составот. Сепак, музиката што ја создавале им звучела како нешто што природно продолжува да биде Linkin Park.
Филмот дава и поглед зад сцената на создавањето на „From Zero“, вклучувајќи ги студиските моменти и соработката со Марк Хопус од Blink-182.
Во приказната свое место има и наследството на Честер Бенингтон, чиј глас и периодот со бендот остануваат важен дел од историјата на Linkin Park.
Групата е формирана во Калифорнија во 1996 година, првично под името Xero. Светската популарност дојде по пристигнувањето на Бенингтон и објавувањето на дебитантскиот албум „Hybrid Theory“ во 2000 година.
Со текот на годините Linkin Park прерасна во еден од најпрепознатливите рок-бендови во светот, со продадени повеќе од 100 милиони албуми. Албумот „From Zero“ по објавувањето стигна до врвот на музичките листи во повеќе земји, означувајќи почеток на ново поглавје за групата.
