Тешкиот пораз од Комо со 4:1 дополнително ги разгоре тензиите во Манчестер Јунајтед. Според пишувањата на англиските медиуми, тренерот Мајкл Карик и бразилскиот напаѓач Матеус Куња имале жестока расправија за време на натпреварот, а несогласувањата наводно продолжиле и на полувремето, кога фудбалерот бил заменет.
До првата конфронтација дошло во текот на првото полувреме, кога Карик бил незадоволен од играта на Бразилецот. Новинарот Семјуел Лакхерст од „Сан“, кој го следел натпреварот во Италија, забележал дека двајцата разменувале остри зборови за време на прекин на играта.
Според порталот „Roundtable“, ситуацијата дополнително се влошила во соблекувалната. Куња наводно бил бесен поради одлуката на тренерот да го извади од игра уште на полувремето, додека Карик имал забелешки за неговиот настап. Незадоволството, според истиот извор, продолжило и по завршувањето на натпреварот.
Бразилскиот напаѓач го започнал дуелот на левата крилна позиција, но во првите 45 минути имал само 27 контакти со топката и упатил еден удар кон противничкиот гол. На полувремето Карик го заменил со Амад Дијало, а направил и промена во средниот ред, внесувајќи го Карлос Балеба на местото на Андреј Сантос.
Измените не го дале посакуваниот ефект. Јунајтед во тој момент губел со 1:0, а во продолжението Комо постигнал уште три гола за убедлива победа од 4:1.
Проблемите во англискиот клуб не се ограничуваат само на овој инцидент. Според објавените информации, Јунајтед минува низ серија слаби резултати, што го зголемува притисокот врз Карик и отвора прашања за атмосферата во соблекувалната.
Дополнителни несогласувања се појавиле и околу тактичкиот пристап на тимот. Капитенот Бруно Фернандеш јавно ја критикувал одлуката на стручниот штаб да не се применува постојан пресинг „човек на човек“, оценувајќи дека така противникот добил премногу простор. Карик, пак, одговорил дека во второто полувреме тимот се обидел да го спроведе тој пристап, но недоволното враќање на играчите во одбрана придонело за примениот гол.
И покрај растечките шпекулации за неговата иднина, според информациите на Би-Би-Си, Карик требало да го предводи тимот и на следниот првенствен натпревар против Борнмут. Во меѓувреме, во медиумите се споменуваат и други тренерски имиња како можни кандидати доколку клубот реши да направи промена.
Засега нема официјална потврда дека расправијата меѓу Карик и Куња ќе доведе до конкретни дисциплински мерки. Сепак, убедливиот пораз и наводниот судир меѓу тренерот и напаѓачот дополнително ја засилија неизвесноста околу состојбата во Манчестер Јунајтед.
