Босна и Херцеговина се обидува да обезбеди големо засилување за својата фудбалска репрезентација. Спортскиот директор Емир Спахиќ отпатувал во Барселона, каде што се обидува да го убеди 19-годишниот Мирза Ќатовиќ во иднина да го носи дресот на БиХ, иако младиот фудбалер има можност да настапува и за други репрезентации.
Ќатовиќ ова лето пристигна во Барселона од младинската школа на Штутгарт, а каталонскиот клуб има сериозни очекувања од неговиот развој. Неговиот потенцијал веќе привлекува внимание, а сега во центарот на интересот е и прашањето за која национална селекција ќе настапува во иднина.
Според информациите на шпанскиот весник „Спорт“, Спахиќ минатиот викенд од трибините на стадионот „Јохан Кројф“ го следел настапот на Ќатовиќ во натпреварот на Барселона Б против Логроњес. Поранешниот фудбалер на Севилја го набљудувал младиот играч од ВИП-ложата, во обид да направи дополнителен чекор кон негово привлекување во репрезентацијата на БиХ.
Ќатовиќ е левоног играч од средниот ред, висок 193 сантиметри, а по својата градба и стил на игра во шпанските медиуми го споредуваат со Марк Бернал. Неговото семејство потекнува од Санџак, но тој уште како дете се преселил во Германија, поради што има можност да ги претставува Германија, Србија или Босна и Херцеговина.
Досега настапувал за младинските селекции на Германија, но конечниот избор за неговата репрезентативна иднина сè уште е отворен. Според медиумските пишувања, БиХ се надева дека ќе успее да го убеди да ја избере токму нејзината селекција.
Во меѓувреме, Барселона внимателно го следи неговиот напредок. Клубот го ангажирал на позајмица до јуни 2027 година, за која, според објавените информации, платил 600.000 евра. Во договорот има и опција за откуп, чија вредност се движи меѓу пет и десет милиони евра, зависно од исполнувањето на договорените услови.
Во Барселона сметаат дека Ќатовиќ има потенцијал да се избори за место во првиот тим, а претстојната сезона во вториот состав ќе биде важна за процената на неговите можности. Неговите настапи би можеле да влијаат и врз одлуката дали каталонскиот клуб целосно ќе го откупи неговиот договор.
За Босна и Херцеговина, евентуалното привлекување на млад фудбалер со ваков потенцијал би претставувало значаен успех. Сепак, засега нема официјална потврда дека Ќатовиќ донел конечна одлука за репрезентацијата што ќе ја претставува.
