Никола Јокиќ одигра фантастичен натпревар во победата на Денвер Нагетс над Чикаго Булс со 133:128 во подготвителниот период пред почетокот на новата сезона во НБА-лигата. Српскиот центар за само 26 минути на паркетот забележа трипл-дабл со 22 поени, 11 скока и 10 асистенции.
Трикратниот добитник на наградата за најкорисен играч во НБА имаше одлична реализација од поле, погодувајќи осум од 12 шута. Успеа да реализира и една тројка од два обида, како и пет од седум слободни фрлања, а натпреварот го заврши и со една блокада.
Јокиќ одлично го започна дуелот, погодувајќи ги сите пет шута од игра во првата четвртина, во која постигна 14 поени. Во продолжението повторно ги покажа своите извонредни додавачки способности, со асистенции што ја воодушевија публиката, вклучувајќи и атрактивно додавање преку речиси целиот терен.
Победата на Денвер не беше лесно извојувана. Чикаго во првото полувреме имаше предност и од 15 поени, благодарение на прецизниот шут за три поени. Булс погодија 13 тројки од 25 обиди во првите две четвртини и на паузата заминаа со водство од 68:59.
Сепак, Денвер направи пресврт во второто полувреме. Нагетс ја добија третата четвртина со 40:26 и во последните 12 минути влегоа со предност од 99:94. Домашниот состав ја задржа разликата до крајот и стигна до втората последователна победа во подготвителните натпревари.
Арон Гордон беше најефикасен во редовите на Денвер со 25 поени, додека Камерон Џонсон додаде 15. Кај Чикаго се истакна Леонард Милер, кој од клупата постигна 26 поени со одличен шут од поле – 11 погодени од 14 обиди.
Јокиќ и минатата сезона продолжи со импресивната серија, завршувајќи меѓу двајцата најдобри во гласањето за МВП-наградата шеста сезона по ред. Иако статистиката од подготвителните натпревари не се вбројува во официјалниот учинок во НБА, неговото издание покажува дека српскиот центар е во одлична форма пред почетокот на новата сезона.
Денвер до почетокот на регуларниот дел од шампионатот ќе одигра уште подготвителни натпревари против Лос Анџелес Клиперс и Лос Анџелес Лејкерс.
