Навивач на Реал Мадрид од Словачка тврди дека тој и неговиот 18-годишен син биле отстранети од трибините на „Камп Ноу“ откако го прославиле голот на Килијан Мбапе во Ел Класико. Наместо да го гледаат до крај големото дерби меѓу Барселона и Реал, таткото и синот завршиле во такси, следејќи го остатокот од натпреварот на мобилен телефон.
Според приказната што Словакот ја раскажал за шпанска „Марка“, патувањето требало да биде посебен подарок за 18-тиот роденден на неговиот син. Реал славел со 2:1, но двајцата, како што тврди таткото, во живо го гледале само првиот гол на мадридскиот клуб.
Тие патувале од Прешов, возеле околу 300 километри до Будимпешта, а потоа со авион заминале за Барселона. Со нив биле и семејни пријатели, татко и син кои навиваат за Барселона. За четири билети од прва категорија платиле вкупно 5.600 евра, односно по 1.400 евра за билет. Седеле во секторот 113, меѓу навивачите на домашниот тим.
Според сведочењето на Словакот, проблемите почнале уште на влезот на стадионот. Тој тврди дека обезбедувањето не им дозволило да влезат со дресовите на Реал и им сугерирало да ги фрлат во корпа за отпадоци. Таткото и синот одбиле да го направат тоа, ги спакувале дресовите и влегле на стадионот, а потоа ги облекле откако седнале на своите места, околу 20 минути пред почетокот на натпреварот.
Словакот наведува дека дресовите ги носеле околу еден час пред да интервенира обезбедувањето. Тој ги отфрла тврдењата дека намерно ги истакнувале за да ги провоцираат домашните навивачи.
Клучниот момент, според неговата верзија, се случил кога Мбапе постигнал гол околу 40-тата минута. Таткото и синот станале, се прегрнале и го прославиле погодокот. Тогаш, како што раскажува, им пришле десетина припадници на обезбедувањето и ги отстраниле од трибината.
„Не направивме никаков чин на насилство, никому не му се заканувавме и не поттикнувавме насилство. Едноставно станавме и се прегрнавме по голот на Мбапе“, изјавил навивачот за „Марка“.
Тој тврди дека додека ги спроведувале надвор од трибините, други гледачи ги навредувале и им свиркале, но дека тие не возвратиле. Првично, според неговото сведочење, им било кажано дека можат да се вратат на своите места доколку ги соблечат дресовите на Реал. По разговорот на обезбедувањето со претпоставените, таа можност наводно била отфрлена.
„Ни рекоа дека премногу навивачи на Барселона веќе нè препознале и дека не можат да ни ја гарантираат безбедноста. Се плашеле дека би можеле да бидеме нападнати ако се вратиме на истите места“, раскажал тој.
По отстранувањето од стадионот интервенирала и полицијата, која им ги проверила документите и составила записници. Според Словакот, во нив било наведено дека носеле дресови и ги провоцирале навивачите на Барселона, а нивното однесување било опишано како насилно или како поттикнување насилство. Тој ги оспорува таквите наводи и бара да се прегледаат снимките и да се сослушаат сведоците.
Проверките, според неговите зборови, траеле околу 45 минути. Во меѓувреме го следел натпреварот на телефонот, а по напуштањето на стадионот со синот се упатил со такси кон апартманот во кој престојувале. Остатокот од Ел Класико го гледале преку екранот на мобилниот телефон.
Таткото вели дека побарал враќање на парите за билетите, но бил упатен да поднесе официјална жалба до Барселона. Досега, како што наведува, не добил поврат на средствата, а жалбата сè уште не ја поднел во писмена форма.
„Не сакам да поттикнувам омраза меѓу навивачите на Реал и Барселона. Не барам бесплатни билети ниту посебен третман“, порачал тој.
На крајот, Словакот објаснил колку го погодило начинот на кој завршило патувањето организирано за роденденот на неговиот син.
„Пред патувањето му ветив на син ми дека никогаш нема да го заборави своето прво Ел Класико. Ветувањето го исполнив. Никој од нас двајцата нема да го заборави тој ден. За жал, не од причините што ги замислував како татко“, заклучил навивачот.
Целиот случај предизвика големо внимание на социјалните мрежи, но засега станува збор за сведоштво на навивачот, а не за независно потврдена верзија на настаните.
