Денес е тешко да се замисли Џејмс Бонд без Даниел Крејг, но неговата руса коса некогаш била сериозна пречка за добивање филмска улога, а подоцна станала и причина за критики кога беше избран за агентот 007.
Пред да го добие култниот лик, Крејг се борел за улогата на грофот Адемар во филмот „Приказна за витезот“. Режисерот Брајан Хелгеланд бил воодушевен од неговата аудиција, но сепак се решил за Руфус Сјуел.
Причината била необична – Крејг и главниот актер Хит Леџер биле русокоси, а режисерот сакал визуелен контраст меѓу нив. Така, бојата на косата била еден од факторите поради кои Крејг останал без улогата.
Интересно е што во истиот филм настапувал и Џејмс Пјуфој, за кого Хелгеланд верувал дека еден ден ќе стане Џејмс Бонд. Пјуфој подоцна дури двапати се појавил на аудиции за улогата на агентот 007, но не ја добил.
Неколку години подоцна, Крејг токму него ќе го надмине во трката за најпознатата шпионска улога. Кога во 2005 година беше објавено дека Крејг ќе биде новиот Бонд, дел од фановите остро реагираа поради неговиот изглед и го нарекуваа „Џејмс Блонд“.
Сепак, по премиерата на „Casino Royale“ во 2006 година, критиките главно исчезнаа. Крејг со својата интерпретација на Бонд успеа да создаде нова ера за франшизата – и на тој начин иронично да докаже дека токму карактерот, а не бојата на косата, била најважна.
