Просторот спроти зградата на „Нова Македонија“, кој скопјани го препознаваат како Парк на новинарите, повторно е предмет на интервенција поради натрупан отпад, импровизирани живеалишта и повеќекратни пријави од граѓаните.
Екипи на Општина Центар, заедно со инспекциските служби, ЈП „Паркинзи на Општина Центар“ и полицијата, спроведоа акција за расчистување на локацијата и отстранување на насобраниот отпад.
Според општината, проблемот на ова место трае подолг период. Во паркот престојувале лица без дом, кои поставувале шатори и други импровизирани објекти, а со текот на времето се создале и сериозни хигиенски проблеми.
Жителите од околните згради повеќепати барале реакција од надлежните, пријавувајќи не само нечистотија, туку и случаи на нарушување на јавниот ред и физички конфликти.
Од Општина Центар велат дека ова не е прва интервенција на локацијата, бидејќи по претходните расчистувања дел од проблемите повторно се појавувале.
Градоначалникот Горан Герасимовски посочи дека општината ќе продолжи да реагира кога јавниот простор е загрозен, но истовремено побара и државните институции да се вклучат во трајно решавање на проблемот со бездомните лица.
По завршувањето на акцијата, просторот треба да биде целосно расчистен и повторно достапен за граѓаните, со цел Паркот на новинарите да стане уредено и безбедно место за престој и секојдневно користење.
