Полската опозиција најави иницијатива за изгласување недоверба на владата на премиерот Доналд Туск, додека политичката и уставната криза во земјата дополнително се продлабочува.
Поранешниот премиер Матеуш Моравјецки предложи формирање привремена влада предводена од Марек Јурек, која би управувала со земјата до одржувањето нови парламентарни избори.
Кризата се заостри по спорот околу Уставниот суд, откако судијката Ана Корвин-Пјотровска го суспендираше претседателот на судот Богдан Свјенчковски и го презеде неговото раководење. Одлуката ја оспорија Свјенчковски и опозициската партија Право и правда (ПиС), обвинувајќи ги сојузниците на Туск за обид за преземање контрола врз институцијата.
Претседателот Карол Навроцки го прекина престојот во Сенегал и се врати во Полска, оценувајќи дека случувањата во Уставниот суд претставуваат нарушување на уставниот поредок. Тој свика итни консултации со парламентарните партии и предупреди дека е загрозена внатрешната безбедност.
Пред зградата на судот во Варшава се одржаа протести, при што полицијата приведе три лица.
Владата на Туск тврди дека нејзините постапки се насочени кон враќање на владеењето на правото по осумгодишното владеење на ПиС, додека опозицијата и претседателот ја обвинуваат дека се обидува да воспостави контрола врз независните институции.
За да успее иницијативата за недоверба, опозицијата мора да обезбеди најмалку 231 глас во полскиот парламент, кој има 460 пратенички места. Засега не е познато дали Моравјецки може да ја собере потребната поддршка за смена на владата.
