Американскиот претседател Доналд Трамп најави нов притисок врз европските сојузници, барајќи од европските земји да ги надоместат средствата што САД досега ги потрошиле за воена помош и муниција испратени за Украина.
Трамп преку објава на социјалните мрежи порача дека Вашингтон ѝ обезбедил на Украина и на НАТО огромна финансиска и воена поддршка, а сега смета дека Европа треба да преземе поголем дел од трошоците.
Американскиот претседател истовремено посочи дека САД моментално се фокусираат на обновување на сопствените резерви на муниција. Тој најави дека Вашингтон повторно ќе продолжи со продажба на оружје на сојузниците, но откако ќе се обезбедат американските потреби.
Изјавите доаѓаат во период на зголемена загриженост околу залихите на американската армија, особено поради воените активности на Блискиот Исток. Според американски претставници, дел од резервите на прецизни ракети биле значително намалени.
Барањето на Трамп може дополнително да ги отвори прашањата за тоа како Европа ќе ја финансира идната воена помош за Украина и колкав дел од товарот треба да преземат европските држави.
Во меѓувреме, дипломатските напори за ставање крај на војната продолжуваат. Рускиот претседател Владимир Путин денеска изјави дека гледа можност за постигнување мировен договор, додека украинскиот министер за надворешни работи Андриј Сибиха оцени дека во дипломатските контакти постои „нова динамика“.
