Годинава земјоделските површини во Овчеполието носат рекордни резултати. Компаниите од групацијата ФЕРОИНВЕСТ реализирале најголема жетва на пченка досега, при што се забележани најдобри резултати од почетокот на производството на овие земјоделски површини.
Пченката е ожнеана на околу 250 хектари, на земјоделските површини на „Сарамзалино Аграр“, „Ерџелија Полјоделство“ и „Агриа“. Според објавените податоци, приносите се за повеќе од 20 проценти повисоки во споредба со минатата година, и покрај неповолните временски услови во текот на сезоната.
Значаен дел од производството се реализира со современа земјоделска опрема и механизација. Жетвата се изведува со сопствени капацитети на компаниите, меѓу кои е и современиот силажен комбајн John Deere 8800.
Дополнителна улога има и системот за наводнување „капка по капка“, поставен на земјоделските површини. Системот овозможува поконтролирано користење на водата и создавање подобри услови за раст и развој на земјоделските култури.
Произведената пченкарна силажа не завршува само како земјоделски производ. Таа се користи како суровина во биогасната електрана „Биоентерпрајз“ во Сарамзалино, во Општина Лозово.
Во електраната, преку процес на анаеробна ферментација, од земјоделската суровина се произведуваат биогас и електрична енергија.
Овој модел овозможува поврзување на земјоделското производство со производство на енергија од обновливи извори. Според компанијата, вложувањата во современа механизација, системи за наводнување и унапредување на производството имаат цел да ја зголемат продуктивноста и да обезбедат стабилна суровинска база за биогасната електрана.
Рекордната жетва годинава претставува уште еден чекор во развојот на овој модел, во кој земјоделското производство и производството на енергија се поврзани во еден интегриран процес.
