Ограничениот пристап до сопствените средства за клиентите на Алта банка прерасна во тема за меѓусебни обвинувања и барања за институционална одговорност. Три политички партии – ДУИ, Левица и СДСМ – реагираа со посебни соопштенија, отворајќи прашања за контролата врз банката, евентуалните ризици за јавните пари и постапките на Народната банка.
ДУИ бара одговор надлежните институции да дадат јасна слика за финансиската изложеност на државата кон Алта банка. Од партијата прашуваат колку пари на државните институции и јавните претпријатија се чуваат во оваа банка, кој одлучил тие средства да бидат доверени токму таму и какви финансиски анализи биле направени пред да се донесат таквите одлуки.
Оттаму бараат да се разјасни дали изборот бил направен врз основа на професионални критериуми и транспарентни процедури или имало влијание од политички и други интереси. ДУИ смета дека мора да се утврди и дали биле разгледани можните ризици поврзани со сопственичката структура на банката и дали институциите претходно добиле предупредувања.
Левица, пак, во фокусот ги става граѓаните кои, според партијата, се соочуваат со сериозни тешкотии при располагањето со сопствените пари. Во реакцијата се посочува дека е воведен неделен лимит од 10.000 денари за физичките лица, додека банкарските експозитури се затворени, а електронското банкарство не е достапно.
Од партијата оценуваат дека ваквиот режим им создава дополнителен товар на домаќинствата, особено на пензионерите и лицата кои имаат редовни обврски за плаќање сметки, кирија, лекови и кредити. Левица го оспорува и начинот на кој се утврдени ограничувањата, прашувајќи зошто обврските што клиентите ги имаат кон банката не се опфатени со истиот лимит.
Партијата бара гувернерот Трајко Славески да објасни какви проверки биле спроведени пред да биде одобрено преземањето на Стопанска банка Битола од страна на српската Алта банка во септември 2025 година. Се бараат и информации за комуникацијата со српскиот банкарски регулатор, како и за тоа кога биле забележани можните проблеми.
СДСМ, пак, отвора прашања за финансиските трансфери поврзани со Алта банка и бара објавување податоци за евентуалното префрлање средства од Србија во Македонија. Партијата прашува колкав бил обемот на тие трансакции, каде завршиле парите и дали постојат финансиски или политички врски што треба да бидат предмет на проверка.
Во соопштението СДСМ изнесува и сомневања за можни сметки на политички функционери во банката, но не приложува докази за овие тврдења. Од партијата бараат Обвинителството да ги испита сите сомнителни трансакции и евентуалните врски со случаи што, според нив, се истражуваат во Србија.
Трите реакции доаѓаат во период кога во јавноста се отвораат дилеми за заштитата на депозитите и надзорот врз банкарското работење. Клучните прашања остануваат колкав е ризикот за средствата на граѓаните и државните институции, зошто се воведени ограничувањата и какви конкретни чекори преземаат надлежните за решавање на состојбата.
