Легендарниот НБА-кошаркар и актуелен аналитичар Чарлс Баркли остро ја критикуваше изјавата на Никола Јокиќ упатена до навивачите на Денвер Нагетс, откако српскиот центар им порача да не доаѓаат на натпреварите доколку планираат да му свиркаат на сопствениот тим.
Баркли смета дека Јокиќ не го разбира односот меѓу професионалните спортисти и публиката и дека негативните реакции од трибините се нормален дел од спортот. Според него, навивачите имаат право да го изразат незадоволството кога тимот не ги исполнува нивните очекувања.
„Тој практично им кажува на навивачите да не доаѓаат ако планираат да свиркаат. Но, не може да играш лошо и да очекуваш дека никој нема да реагира“, порача Баркли во емисија на SiriusXM NBA Radio.
Поранешниот најкорисен играч во НБА-лигата објасни дека односот меѓу клубовите и навивачите функционира врз основа на резултатите и настапите на теренот. Како пример го посочи натпреварот меѓу Филаделфија и Кливленд, на кој домашната публика свиркала поради лошата игра во првото полувреме, но подоцна почнала да навива откако тимот се вратил во натпреварот.
„Така функционира спортот. Те сакаме кога играш добро, но ќе се свртиме против тебе кога играш лошо. Постојано им велам на играчите да не бидат толку чувствителни. Истото важи и за нас новинарите. Ќе ве фалиме кога играте добро, но ќе ве критикуваме кога не ги исполнувате очекувањата. Ако не разбирате како функционира тој однос, тогаш едноставно сте глупави“, изјави Баркли.
ЈОКИЌ НЕ СЕ ПОВЛЕЧЕ ОД СВОИТЕ ЗБОРОВИ
Контроверзната изјава на Јокиќ дојде по натпреварот против Њу Орлеанс, кога навивачите на Денвер му свиркаа на сопствениот тим поради големата негатива. Иако Нагетс успеаја да се вратат и да победат со 141:135 по продолжение, српскиот кошаркар беше незадоволен од реакцијата на публиката.
Подоцна, по убедливиот пораз од Голден Стејт Вориорс со 134:114, Јокиќ повторно ја коментираше ситуацијата и остана на својот став.
„Стојам зад она што го кажав. Играл сум во многу полоши атмосфери. Сум играл пред 10, 50 или 100 луѓе, пред многу поголема публика. Но, не сум навикнат навивачите да му свиркаат на сопствениот тим. Тоа никогаш не сум го доживеал дома. Веројатно се случува и на други места, но мислам дека тоа не се вистински навивачи“, порача Јокиќ.
Неговите зборови предизвикаа поделени реакции меѓу љубителите на кошарката. Додека едни сметаат дека навивачите треба да му даваат поддршка на тимот и во тешките моменти, други потсетуваат дека купувањето билети и долгогодишната поддршка им даваат право да го искажат незадоволството.
Критиките на Баркли дополнително ја отворија дебатата за границата меѓу поддршката и критиката во професионалниот спорт.
