Во Њујорк денеска започнува главниот дел од УС Опен 2026, последниот Гренд слем турнир во сезоната. Во центарот на вниманието е Новак Ѓоковиќ, кој повторно има можност да испише историја и да стигне до рекордната 25. Гренд слем титула.
Ѓоковиќ, кој има 24 освоени Гренд слем трофеи, на првиот ден од турнирот ќе игра против Аргентинецот Маријано Навоне. Српскиот тенисер е меѓу главните фаворити за титулата, а во Њујорк пристигнува со голема мотивација да го освои трофејот кој последен пат го подигна во 2023 година.
Голем хендикеп за турнирот е отсуството на светскиот број еден Јаник Синер, кој официјално се повлече од УС Опен на 21 август. Со неговото отсуство, ждрепката е значително променета и се отвора дополнителен простор за останатите фаворити.
Карлос Алкараз, пак, ќе ја брани титулата освоена минатата година. Шпанецот се враќа во Њујорк по повеќемесечна пауза од настапите во сингл и својот прв меч ќе го игра против Роман Сафиулин.
Посебно интересен е и распоредот во ждрепката, бидејќи Ѓоковиќ и Алкараз се наоѓаат во истата половина и би можеле да се сретнат во полуфиналето. Тоа би бил уште еден голем дуел меѓу две генерации на светскиот тенис.
Овогодишниот УС Опен носи и рекорден награден фонд од 108 милиони долари. Победниците во машка и женска конкуренција ќе добијат по 5,5 милиони долари, што е најголема награда за шампион на еден Гренд слем турнир досега.
Главниот дел од турнирот започнува денес, 30 август, а машкото финале е закажано за 13 септември.
