Ѕвездата на Сан Антонио Спарс, Виктор Вембањама, има необичен пристап кон грижата за сопственото тело – често тренира и се движи бос, а кога носи обувки, избира минималистички модели. Францускиот кошаркар смета дека силните и подвижни стапала се особено важни за високите играчи, кои поради својата градба се изложени на дополнителни физички оптоварувања.
Со висина од 224 сантиметри, Вембањама верува дека здравјето на стапалата има значително влијание врз целокупната физичка состојба. Според него, проблемите во оваа област можат да се одразат и врз други делови од телото.
„Високите играчи отсекогаш имале проблеми со стапалата. Сè повеќе сфаќам дека стапалата се заслужни за многу повеќе работи отколку што мислиме“, објасни кошаркарот.
Тој раскажа и интересна ситуација од тренинг, кога еден млад соиграч бил изненаден што го видел како вежба без обувки. Новиот играч, според Вембањама, воопшто не знаел дека постои можност да се тренира бос.
„Смешно е, бидејќи неодамна разговарав со еден новајлија. Дојдов на тренинг бос, а кога ме виде без обувки, ми рече: Не знаев дека едноставно може да се биде без чевли“, раскажа Французинот.
Вембањама објасни дека одењето бос и користењето минималистички обувки се дел од неговиот начин за одржување на силата и подвижноста на стапалата. Тој смета дека класичните обувки често го ограничуваат нивното природно движење и форма.
„Се трудам да одам бос секогаш кога можам и да носам минималистички обувки. Морате да ги зајакнете стапалата. Обувките често не ја почитуваат нивната природна форма. Ако имате силни стапала и правилно држење на телото, и останатото може правилно да се развива – колената, колковите, грбот, буквално сè“, порача кошаркарската ѕвезда.
