Остри пораки за ризикот од нова ескалација испрати рускиот претседател Владимир Путин за време на годишниот форум на клубот „Валдај“ во Москва. Во центарот на неговото обраќање повторно беа војната во Украина, односите со Западот и ситуацијата околу руската ексклава Калињинград.
Путин предупреди дека доколку дојде до директен напад врз Русија, што во неговото обраќање го поврза и со можен напад врз Калињинград, Москва би можела да размислува за употреба на сите видови оружје што ѝ стојат на располагање. Калињинград се наоѓа меѓу Полска и Литванија и има големо стратешко значење за Русија.
„Во случај на директен напад врз Руската Федерација, прашањето за употреба на сите видови оружје што ги поседува нашата земја неизбежно и веднаш ќе биде на дневен ред“, порача Путин.
Неговата изјава доаѓа само еден ден откако Русија испрати дипломатско предупредување до НАТО во кое се наведува дека Москва би можела да употреби и нуклеарно оружје доколку Алијансата се обиде да го изолира Калињинград. НАТО, од своја страна, порача дека е одбранбен сојуз и ги оцени нуклеарните закани како несоодветни.
Зборувајќи за војната во Украина, Путин повторно ја изнесе позицијата на Москва дека Русија не го започнала конфликтот, туку дека, според неговото тврдење, била доведена во ситуација во која морала да реагира.
Рускиот претседател оцени дека меѓународните тензии би можеле да се намалат со слабеењето на она што тој го опиша како западна хегемонија. Во исто време, предупреди дека светот се наоѓа во чувствителен период и дека треба да се избегнат сценарија кои би можеле да доведат до катастрофални последици.
Посебно внимание Путин посвети на опасноста од постепено зголемување на мерките и контрамерките меѓу државите. Според него, неконтролираната ескалација може да доведе до момент по кој враќањето назад би било исклучително тешко.
Тој предупреди дека самодовербата и потценувањето на ризиците можат да го турнат светот кон опасна точка, особено во услови кога најголемите воени сили располагаат со оружје со огромна разорна моќ.
„Можеме ли да бидеме сигурни дека тоа оружје никогаш нема да биде употребено? Секако дека не можеме“, порача Путин, нагласувајќи дека токму поради тоа треба да се избегне развој на настани што би можел да доведе до таков исход.
Москва во последните денови испрати повеќе предупредувања поврзани со Калињинград, додека НАТО истакнува дека не гледа непосредна закана за територијата на Алијансата од Русија.
Обраќањето на Путин доаѓа во период на зголемени тензии меѓу Русија и западните земји, при што двете страни меѓусебно се обвинуваат за чекори кои можат дополнително да ја влошат безбедносната состојба во Европа.
