Смртта на легендарната кантри-пејачка Доли Партон предизвика огромен бран емоции кај нејзините обожаватели, кои масовно се вратија на нејзината музика. Нејзините најголеми хитови деновиве повторно се меѓу најслушаните песни ширум светот.
Според податоците на аналитичката компанија Luminate, слушаноста на нејзината музика во САД на денот на нејзината смрт скокнала од околу 1,2 милиони на повеќе од 30 милиони аудио и видео стримови. Само еден ден подоцна бројката достигнала 46,3 милиони.
Уште поголем раст е регистриран на глобално ниво. Од околу 2,5 милиони стримови во понеделникот, бројот пораснал на 41,8 милиони во вторникот, а потоа достигнал речиси 80 милиони стримови. Со тоа Партон станала најслушаниот музички изведувач во светот тој ден.
Најголемо внимание привлекла „Jolene“, чија слушаност во САД се зголемила од околу 196 илјади на повеќе од четири милиони стримови. Голем скок забележале и „9 to 5“, „Islands in the Stream“, „I Will Always Love You“, „Here You Come Again“ и „Coat of Many Colors“.
Зголемен интерес има и за нејзините други музички соработки, меѓу кои „There Was Jesus“ со Зак Вилијамс и „Tyrant“ со Бијонсе.
Покрај музиката, пораснала и продажбата на книгите поврзани со животот и творештвото на Партон. Нејзините мемоари „Dolly Parton, Songteller: My Life in Lyrics“, како и книгата инспирирана од песната „Coat of Many Colors“, се најдоа меѓу најбараните наслови.
Партон зад себе остава повеќедецениска кариера во која беше успешна како пејачка, актерка, текстописец, претприемач и филантроп. Но, реакцијата по нејзината смрт покажува дека токму нејзините песни остануваат еден од најсилните делови од нејзиното наследство.
