Милан постигнал договор со Порто за трансферот на мексиканскиот напаѓач Сантијаго Хименез, кој до крајот на сезоната ќе настапува како позајмен играч во португалскиот клуб.
Според информациите од повеќе извори блиски до преговорите, договорот предвидува можност за откуп, која под одредени услови автоматски ќе стане задолжителна.
Вкупната вредност на трансферот може да достигне 20 милиони евра. Порто нема да плаќа надомест за самата позајмица, додека клаузата за откуп е поставена на 18 милиони евра, плус дополнителни два милиони евра преку бонуси.
Хименез подолг период беше поврзуван со заминување од Милан, откако стана јасно дека не е во плановите на тренерот за новата сезона.
Мексиканскиот репрезентативец преферирал трансфер во Порто, каде што тренерот Франческо Фариоли имал голема желба да го види во својот тим.
Преговорите траеле подолго поради несогласувања околу условите за откуп, но во завршницата бил постигнат компромис со кој клаузата може да стане задолжителна доколку Хименез исполни одредени услови, меѓу кои и бројот на настапи.
Милан го доведе Хименез од Феенорд во јануари 2025 година за сума поголема од 30 милиони евра. Напаѓачот имаше добар старт во италијанскиот клуб, но подоцна неговата форма беше нарушена од повреди и проблеми со глуждот, поради што во декември 2025 година мораше да оди и на операција.
За Милан Хименез одигра 37 натпревари во сите натпреварувања, на кои постигна седум гола и забележа шест асистенции.
Сега во Порто ќе има нова можност да ја врати формата и да се наметне како еден од главните напаѓачи на португалскиот тим.
