Наместо музика во ушите, подкаст или постојано проверување на телефонот, сè повеќе луѓе избираат едноставна прошетка во тишина. Трендот познат како „тивко одење“ се шири на социјалните мрежи и го поттикнува прашањето дали понекогаш ни е потребна само пауза од дигиталниот свет.
Идејата е едноставна – да се излезе на прошетка без слушалки, телефонски разговори и други дигитални содржини. Наместо тоа, вниманието се насочува кон чекорите, звуците од околината и сопствените мисли.
Терминот стана популарен благодарение на инфлуенсерката Меди Мајо, која преку видео на „ТикТок“ раскажала за своето искуство со одење без телефон и слушалки. Нејзината објава предизвикала голем интерес, но и коментари од корисници кои посочиле дека станува збор за нешто што луѓето го практикувале и пред појавата на социјалните мрежи.
Според приврзаниците на овој начин на пешачење, отстранувањето на постојаните дигитални стимуланси може да помогне човекот повеќе да се фокусира на моментот. Прошетката така може да стане еден вид медитација во движење, при која вниманието се префрла од екраните кон телото и непосредната околина.
Во секојдневието исполнето со известувања, разговори, работа и часови поминати пред екрани, кратката пауза без дополнителни содржини може да биде начин за одмор од постојаната дигитална стимулација. Самото одење, пак, е физичка активност која може да придонесе за подобро расположение и намалување на стресот.
Сепак, тоа не значи дека слушањето музика додека пешачите е нешто лошо. Музиката може да го подобри расположението, да го направи вежбањето попријатно и кај некои луѓе да помогне полесно да останат активни.
Затоа „тивкото одење“ повеќе може да се гледа како потсетник дека во текот на денот понекогаш е корисно да се направи пауза од телефонот и дигиталните содржини. Неколку минути пешачење без слушалки може да бидат доволни за да се посвети поголемо внимание на она што се случува околу нас и на сопствените мисли.
