Кристијано Роналдо смета дека неговите фудбалски достигнувања и голгетерскиот учинок не добиваат доволно признание. Португалската ѕвезда верува дека нивото на кое настапува и бројот на постигнати голови се потценети, а за себе вели дека е најдобриот фудбалер во историјата.
„Луѓето не му оддаваат доволно признание на нивото на кое играм, ниту на моите голови“, изјави Роналдо во интервју во кое зборуваше за своите резултати, амбиции и иднината на кариерата.
Напаѓачот на Ал Наср досега има постигнато 980 голови на 1.337 професионални настапи за клубовите и португалската репрезентација. Една од неговите цели е да стигне до бројката од 1.000 погодоци, но нагласува дека не сака тоа да му стане опсесија.
Според него, достигнувањето на оваа граница би било нешто неверојатно, но не сака да се оптоварува со тоа колку голови ќе постигне до крајот на кариерата. Роналдо смета дека сè треба да се одвива природно и дека конечната бројка нема да го промени неговото мислење за сопственото место во фудбалската историја.
Тој посочи дека дури и ако кариерата ја заврши со 920, 925 или 930 голови, и понатаму ќе се смета за најдобар играч во историјата, повикувајќи се на статистиката и своите достигнувања.
Кога станува збор за тоа колку долго ќе продолжи да игра, Роналдо признава дека нема јасен одговор. Вели дека не може да предвиди што ќе донесе иднината и дека е можно еден ден да се разбуди без потребната мотивација за да продолжи со фудбалот.
Португалецот засега не открива кога би можел да стави крај на кариерата, оставајќи ја таа одлука за моментот кога ќе почувствува дека повеќе нема желба да се натпреварува.
