Макс Верстапен стигна до првата победа во сезоната 2026 во трка исполнета со пресврти, дожд, прекини и проблеми за неколку од фаворитите. Возачот на Ред Бул ја освои Големата награда на Бахреин, која поради безбедносната ситуација на Блискиот Исток беше преместена на патеката Сепанг во Малезија.
Втор низ целта заврши Кими Антонели со Мерцедес, додека третото место му припадна на Луис Хамилтон со Ферари, кој успеа да стигне до подиумот иако трката ја започна со сериозен пад во поредокот.
Трката започна со голема неизвесност. Силниот дожд и грмежите ја натераа ФИА да го одложи стартот поради големото количество вода на патеката. Дополнителни проблеми се појавија и за време на формацискиот круг, кога Исак Хаџар излета во песокот, а Верстапен и Хамилтон пријавија проблеми со забрзувањето и прилепувањето на болидите.
Кога конечно беше даден стартот, патеката веќе почнуваше да се суши, што ги стави тимовите пред тежок избор околу пневматиците. Возачите кои стартуваа со гуми за влажна патека имаа подобра почетна позиција, а Антонели веднаш ја презеде лидерската позиција.
Верстапен на почетокот беше трет, но брзо се проби пред Џорџ Расел и започна да го намалува заостанувањето зад лидерот. Хамилтон, Шарл Леклер и возачите на Мекларен, пак, платија висока цена поради изборот на гуми за сува патека.
Првиот поголем пресврт се случи кога Валтери Ботас заврши надвор од патеката, по што беше активиран безбедносниот автомобил. Во тој момент условите значително се променија и речиси сите болиди преминаа на гуми за сува патека.
По рестартот следуваше жестока борба меѓу Верстапен, Расел и Антонели, од која Холанѓанецот излезе како лидер. Оттогаш Верстапен постепено почна да создава предност, додека Антонели повторно го престигна Расел и се врати на второто место.
Хамилтон во меѓувреме започна голем пробив низ поредокот. По лошиот почеток, возачот на Ферари успеваше круг по круг да ги минува ривалите и да се враќа кон врвот.
Но драмата не заврши. Во 43. круг Александар Албон имаше дефект на менувачот, што повторно ја промени ситуацијата на патеката. Верстапен го искористи периодот на виртуелен безбедносен автомобил за да влезе во бокс, а подоцна на патеката излезе и вистинскиот безбедносен автомобил.
Со тоа разликите меѓу возачите повторно се намалија и последните кругови донесоа нова неизвесност. Само пет круга пред крајот, Џорџ Расел доживеа дефект и мораше да се откаже додека се наоѓаше на третото место. Речиси истовремено, Ландо Норис направи грешка и заврши во песокот.
Последниот рестарт не му донесе проблеми на Верстапен. Возачот на Ред Бул го задржа Антонели зад себе и без поголема опасност стигна до целта како победник.
Најголемото внимание во финишот го привлече борбата за третото место. Хамилтон успеа да го престигне Хаџар и со тоа да стигне до подиумот, што беше особено впечатливо ако се земе предвид дека на почетокот на трката се најде речиси на дното од поредокот.
Верстапен со оваа победа ја запиша првата своја победа во 2026 година. Антонели заврши втор и дополнително ја зголеми својата предност во шампионатот, додека Хамилтон со третото место направи голем чекор напред по лошиот старт на трката.
