Porsche подготвува исклучително редок автомобил наменет за љубителите на спортското возење и планинските патишта. Новиот 911 GT3 Bergsport ќе биде ограничен на само 100 примероци, а продажбата ќе биде достапна на само четири европски пазари.
Специјалната верзија официјално треба да биде претставена на 1 септември, а зад проектот стојат претставништвата на Porsche во Франција, Италија, Австрија и Швајцарија. На овие пазари автомобилот и ќе се продава, додека Македонија и повеќето други европски земји не се опфатени.
Името Bergsport е инспирирано од традицијата на Porsche и неговите лесни спортски автомобили од шеесеттите години, кои биле создадени за натпревари на планински и свиоковити патеки.
Иако станува збор за модел ориентиран кон возење по планински патишта, новиот автомобил ќе ја задржи препознатливата затворена каросерија на 911 GT3. Меѓу визуелните разлики се очекува да биде и задниот спојлер во стилот „ducktail“, како и посебно уредената внатрешност со уникатни кожни детали.
Под хаубата најверојатно ќе се најде атмосферскиот 4,0-литарски шестцилиндричен боксер мотор што се користи и во актуелниот 911 GT3. Porsche, сепак, сè уште не ги објавил официјалните технички податоци и не потврдил дали ќе има промени во перформансите.
Bergsport нема да биде целосно нов модел, туку специјално доработена верзија на 911 GT3, со карактер прилагоден за динамично возење низ свиоците и алпските премини.
Со само 100 произведени автомобили, моделот ќе биде исклучително редок. Доколку примероците се распределат рамномерно, на секој од четирите пазари би му припаднале околу 25 автомобили, иако конечната распределба сè уште не е позната.
Интересно е што дел од информациите за автомобилот се појавиле пред официјалната премиера, откако деталите кратко време биле достапни на австриската интернет-страница на Porsche, а потоа биле отстранети.
