Јапонските воздушни сили останаа без контакт со еден од своите извидувачки дронови „Глобал Хок“, кој исчезнал од радарот за време на летот долж северозападниот брег на земјата.
Станува збор за беспилотно летало RQ-4B, кое последен пат било забележано околу 50 километри од брегот на префектурата Тотори, во текот на попладневните часови. Засега нема информации за причината поради која е изгубен контактот, ниту за конкретната мисија што ја извршувал дронот.
Јапонските сили располагаат со три вакви летала, а сите се стационирани во воздухопловната база Мисава, во префектурата Аомори.
„Глобал Хок“ е наменет за долготрајно извидување и може да лета на височина од околу 18 километри и да остане во воздух до 36 часа без прекин. Токму поради големиот радиус и можноста за следење на огромни подрачја, овие летала имаат значајна улога во јапонското следење на безбедносната состојба во регионот, особено во близина на Кина и Северна Кореја.
Исчезнувањето на дронот доаѓа во период кога Токио забрзано ги менува своите одбранбени планови. Јапонија вложува повеќе во беспилотни системи, вештачка интелигенција и нови технологии за војување, како одговор на променетата безбедносна ситуација во Источна Азија.
Според петгодишниот одбранбен план усвоен во 2022 година, земјата значително ги зголеми издвојувањата за одбрана, со цел зајакнување на способностите на своите Сили за самоодбрана и соочување со растечката воена моќ на Кина.
Во меѓувреме, владата на премиерката Санае Такаичи подготвува нови стратегии за национална безбедност и одбрана, кои се очекува да бидат претставени подоцна годинава. Кина остро го критикува јапонското воено засилување, оценувајќи го како враќање кон „нов милитаризам“.
